Акафист Турковицкой иконе Божьей Матери

 

КОНДАК 1

Избранней от всех родов Заступнице рода христианскаго, покровом Своея благости покрывающей православных страны нашея, благодарственная пения приносим Ти, Владычице, о явлении нам чудныя Иконы Твоея в веси Турковицстей. Ты же яко Всемилостивая Заступнице всех с верою к Тебе притекающих, от всяких нас бед свободи, да зовем Ти: Радуйся, Мати Божия, православных страны нашея Похвало, Покрове и Утверждение.

Акафист святой великомученице Ирине

Кондак 1

Избранной Богом от идолослужительнаго рода на просвещение языков, богомудрей и преславней невесте Христовой Ирине,  благодарственное и хвалебное пение воспоем ти молитвенницы твои, святая  и многострадальная великомученице Ирино. Ты же, имущи дерзновение ко  Господу, от всяких нас бед и скорбей свободи, да зовем ти: Радуйся,  Ирино, невеста Христова преславная.

Далее

Акафист Пресвятой Богородице ради чудотворной Ея иконы “Неупиваемая Чаша”

Кондак 1

Избранное и дивное избавление  нам даровася, / Твой образ честный, Владычице Богородице, / яко  избавльшеся явлением его от недугов душевных и телесных / и скорбных  обстояний, / благодарственная хваления приносим Ти, Всемилостивая  Заступнице. / Ты же, Владычице, “Неупиваемою Чашею” нами  именуемая, / приклонися благоутробно к нашим воздыханиям / и воплем  сердечным, / и избавление подаждь страждущим недугом пианства, / да с  верою воззовем Ти: / Радуйся, Владычице, Неупиваемая Чаша, / духовную  жажду нашу утоляющая.

Далее

Акафист Пресвятой Богородице ради чудотворной Ея иконы, именуемой «Касперовская»

Кондак 1
Избранной от всех родов и дивной Заступнице всего рода христианскаго  Пресвятой Богородице Деве Марии, похвалы приносим мы недостойнии,  чудному и святому Ея образу «Касперовскому»,  принесенному в землю нашу из Сербии православной на укрепление веры  Христовой и нашего спасения с любовию прибегающих к Ней и поющих:
Радуйся, Богомати Пречистая, града Одессы и всея земли Черноморския покрове и заступление.
( Читать дальше... )

Акафист преподобному Стилиану Пафлагонскому

Кондак 1

Избранный чудотворче и угодниче Христов, скорый помощниче и молитвенниче наш, преподобне отче Стилиане, прославляя прославльшаго тя Господа, похвальная пения приносим ти, чтущии святую память твою. Ты же, предстоя пред Престолом Вседержителя, воздвигни о нас, грешных, многомощныя молитвы твоя, взывающих ти: Радуйся, преподобне отче Стилиане, преславный чудотворче.

Акафист святой благоверной княжне преподобной Евфросинии Суздальской

 

Кондак 1
Избранная от чрева матерня, угоднице Христова княжна Евфросиние, прославляюще прославльшаго тя Христа Господа, хвалебная приносим ти песни, мати преподобная; ты же, яко имущая дерзновение ко Господу, от всяких нас бед свободи, да зовем ти:
Радуйся, Евфросиние, невесто Христова прекрасная.

Акафист Пресвятой Богородице в честь чудотворной иконы Иверской

Икона Здесь
кондак 1
Взбранной Воеводе, Владычице нашей Богородице, похвальная пения приносим Ти раби Твои, яко пришествием честнаго образа Твоего стяжавшии щит крепкий, стену необоримую и стража неусыпна. Ты же, яко имущая державу непобедимую, покрый и защити нас, Владычице, от всех врагов видимых и невидимых и избави от всякаго вреда, душевнаго и телеснаго, да зовем Ти: радуйся, благая Вратарнице, двери райския верным отверзающая.
Подробнее...

Акафист Богоявлению (Крещению) Господню

Кондак 1

Возбранный Воеводо, Царю неба и земли, Тебе Просветителя нашего зряще во Иордане от раба крещаема, небеса ужасошася, и вся земля вострепета, Ангели же удивишася и вся тварь возрадовася. Мы же недостойнии благодарственно Тебе вопием: ко грешником и мытарем явился еси, да водами омыеши человеков грехи. Слава Тебе, Сыне Божий, во Иордане Крестивыйся и весь мир просвещей, слава Тебе.

Подробнее...

Акафист и молитва преподобному Герману Аляскинскому

Кондак 1

Избра́нный чудотво́рче и пресла́вный уго́дниче Христо́в, богоно́сне о́тче наш Ге́рмане, Аля́ски украше́ние и Це́ркве Правосла́вныя ра́дование, воспева́ем ти похвалы́ сия́. Ты же, я́ко Небе́сный наш покрови́тель и всемо́щный пред Бо́гом моли́твенник, не преста́й хода́тайствовати о нас, ча́дех твои́х, усе́рдно тебе́ вопию́щих: Ра́дуйся, преподо́бне о́тче наш Ге́рмане, пресла́вный чудотво́рче.

Подробнее...

Акафист Пресвятой Богородице перед Ея иконой, именуемой “Тихвинская”

Акафист Пресвятой Богородице перед Ея иконой, именуемой “Тихвинская”

Кондак 1

Взбранной Воеводе, Владычице нашей Богородице благодарственная пения восписуем о явлении чудныя Ея иконы, к Нейже притекающии присно избавляются от враг видимых и невидимых. Ты же, Госпоже Неба и земли, яко милосердная Мати, приими ныне малое сие моление наше и неотступну никогда же сотвори милость Твою от нас и заступление, охраняющи от всех бед и напастей нас, зовущих Ти: Радуйся, Владычице, милостивая о нас пред Богом Заступнице.
Икос 1

Ангелов лицы ликовствующе служат Тебе, Владычице, и почитающе Тя, на руку Твоею носившую Творца видимыя и невидимыя твари, икону Твою с места на место преносят. Мы же, земнороднии, дивящеся чудному явлению иконы Твоея, Ангелы носимыя, вопием Ти сице: Радуйся, всех Небесных Сил высшая; Радуйся, вся ангельския чины превосходящая. Радуйся, Честнейшая Херувим; Радуйся, Славнейшая без сравнения Серафим. Радуйся, радование Ангелов; Радуйся, похваление ликов небесных. Радуйся, от Ангелов воспеваемая. Радуйся, от Серафимов прославляемая. Радуйся, от Архангел поклоняемая; Радуйся, от воинств небесных почитаемая. Радуйся, в иконе Твоей от Ангел чтимая; Радуйся, в видимем образе Твоем от невидимых сил носимая. Радуйся, Владычице, милостивая о нас пред Богом Заступнице.

Кондак 2

Видяще рыбарие над пучиною вод носимую невидимою силою и светом подобно солнцу сияющую Твою, Богомати, икону с Предвечным Младенцем, рыбарей призвавшим на уловление мира в сети спасения, возопиша: Аллилуиа.

Икос 2

Разум недоразуменный дивнаго явления иконы Твоя разумети людие ищуще уведеша, яко чтимая в Цареграде пречестная икона в наследие российскому роду даровася. Темже мы, благодаряще за милость Твою к роду нашему, вопием Ти: Радуйся, Мати истинныя жизни; Радуйся, послушанием Твоим преслушание Евы исцелившая. Радуйся, затворенный Эдем отверзшая; Радуйся, миру явившая Сокрушителя главы змиевой. Радуйся, ковчеже Умирителя мира носивший; Радуйся, мир спасшая от потопления греховнаго. Радуйся, лествице еюже сниде Бог; Радуйся, земных возводящая на небо. Радуйся, море фараона мысленнаго потопившее; Радуйся, купино, неопалившаяся всельшимся в Тя огнем Божества. Радуйся, скрижале Богописанная; Радуйся, каменю, воду жизни источивший жаждущим. Радуйся, Владычице, милостивая о нас пред Богом Заступнице.

Кондак 3

Сила Вышняго осеняше страну Тихвинскую егда икона Пречистыя Богоматере, многочастне являющися и временным пребыванием освящающи землю, к воздвизанию храмов святых возбуждаше, да славится имя Владычицы во славу Триипостаснаго Бога, Емуже вопием: Аллилуиа.

Икос 3

Имуще благоутробное изволение, да людие страны Тихвинския вожделеют пребывания Твоего с ними да памятуют выну покров Твой, икону Твою являла еси многочастне, дондеже указала еси богоизбранное место вселения ея. Темже чудящеся вопием Ти: Радуйся, скиние, в нейже вселися Божество телесне; Радуйся, святая святых, в неюже единою вниде вечный Архиерей. Радуйся, кивоте позлащенный Духом, Законодателя носивший; Радуйся, светильниче, огнем Божественным возженный. Радуйся, стамно, носившая манну жизни Христа; Радуйся, трапезо, хлеб животный вместившая. Радуйся, кадильнице, угль Божества имущая, мир весь облагоухавшая; Радуйся, жезле цвет, прозябший Христа. Радуйся, столпе, к вечному наследию руководяй; Радуйся, облаче, от враг видимых и невидимых покрываяй. Радуйся, земле обетования; Радуйся, руно, на негоже Христос, яко дождь сниде с небесе. Радуйся, Владычице, милостивая о нас пред Богом Заступнице.

Кондак 4

Бурю смущения и скорби утолити тщащеся, благовернии людие взываше ко Господу: яви нам Божественный дар, егоже человеколюбие стране Российстей послал еси, не скрый сокровища, имже душевную нищету нашу обогатити надеяхомся, претвори печаль нашу в радость, отри слезы и рыдания. И улучивше желаемое, возопиша: Аллилуиа.

Икос 4

Слышав пастырь паствы своея радостное обретение и Матерь Пастыреначальника упасшуюся в странах Тихвинских, устрояет храм в честь новоявленныя иконы Ея, и пресвитеры учреждает, да выну прославляя Богоматерь вопиют Ей: Радуйся, Дщи, приклонившая ухо ко гласу Отца Небеснаго; Радуйся, яко праматернее сетование разрушися рождеством Твоим. Радуйся, Невесто, Еяже доброты вожделе Царь Небесный; Радуйся, Царице, одесную Царя представшая. Радуйся, рясны златыми украшенная и всю славу внутрь имущая; Радуйся, вводящая многих в чертог Царства Небеснаго. Радуйся, яблоко, егоже благовоние обоняет весь мир; Радуйся, крине чистоты, блистанием светящийся. Радуйся, миро благовонное, всему миру излиянное; Радуйся, царскую порфиру, плоть Творца всех, из девственных кровей Твоих исткавшая. Радуйся, живый запечатленный источниче, источивший воду жизни; Радуйся, мысленный винограде, гроздь Божественный возрастивший. Радуйся, Владычице, милостивая о нас пред Богом Заступнице.

Кондак 5

Боготечная звезда явися икона Твоя, Богомати, вся страну Тихвинскую обтекающи, и сущих во тьме невежествия светом богове-дения озаряющи, скорбящих радостию осиявающи, заблуждающих же на путь делания заповедей Сына Твоего и Бога наставляющи. Ему же благодарственне вопием: Аллилуиа.

Икос 5

Видев Георгий на кладе древа седящу Жену, жезл червленный в руках имущу и светом неизреченным сияющу, Ейже предстоя беседоваше дивный Святитель, позна чрез благоухание благодати Тя, Богородицу, чувственный зрак приимшую и Святителя Николая предстояща Тебе, и возопи со трепетом: Радуйся, доме, егоже созда Себе для вселения Премудрость Божия; Радуйся, Дево, Еммануила родившая. Радуйся, жезле Иессеов, от негоже прозябе цвет Христос Бог; Радуйся, Неневестная Невесто, осенением Духа заченшая Сына. Радуйся, свитче, в немже перстом Отчим написася Слово; Радуйся, книго девства запечатленная, Иосифу на хранение врученная. Радуйся, клеще таинственная угль Божества во чреве приемшая; Радуйся, престоле превознесенный, на немже плотию возседе Христос. Радуйся, облаче легкий, на немже прииде Господь славы; Радуйся, врата затворенная, имиже един Христос пройде. Радуйся, горо несекомая, от неяже краеугольный камень отсечеся, Христос; Радуйся, огнеросная пеще, неопально приимшая огнь Божества. Радуйся, Владычице, милостивая о нас пред Богом Заступнице.

Кондак 6

Проповедник быв видимаго Твоего пребывания в стране Тих-винстей и дивнаго промышления о ней, благочестивый Георгий явление Твое и волю Твою людем возвести, ейже неповинующися чудесы вразумляются славити Тя, Владычице, и пети Богу: Аллилуиа.

Икос 6

Возсияти свету Богопознания явлением иконы Твоей изволившая, и свет иноческия жизни возжещи благоволила еси, Богомати, на месте явления Твоея иконы, да иноков лицы вопиют Ти непрестанно: Радуйся, неплоднаго корене благоплодное прозябение; Радуйся, от младенчества Богу посвященная. Радуйся, во святем храме воспитавшаяся; Радуйся, Богу уневестившаяся. Радуйся, всеми добро-детельми преукрашенная; Радуйся, светоносная палато, Владыце уготованная. Радуйся, благодатию Божию предочищенная; Радуйся, от начала веков во главизну нашего спасения предызбранная. Радуйся, Невесто Архитектона небеснаго, земному тектону на хранение врученная; Радуйся, малый Назарет Своим пребыванием возвеличившая. Радуйся, горних сил похвало; Радуйся, всех земнородных слава. Радуйся, Владычице, милостивая о нас пред Богом Заступнице.

Метки: Богородица

Pages: 1 2

Акафист Пресвятой Богородице перед иконой «Знамение» Курская-Коренная

Кондак 1

Избранной Воеводе и благой Одигитрии, путеводящей нас к Небесному Граду, приидите, припадем вси, града зде пребывающего не имущии, Тоя всесильнаго заступления просяще, чудеса же, от лет древних даже доныне от иконы Ея бываемыя, поминающе, велегласно возопиим:

Икона Божией Матери «Знамение» (Курско-Коренная)

Радуйся, Владычице, знамения милости Твоея миру присно являющая.

Икос 1

Ангели удивишася, зряще Тя, Владычице, иконою Твоею, яко столпом огненным, нам предходящую в великом исходе нашем из земли, беззаконники порабощенныя. Не Моисея бо, но Самую Тя имамы Путеводительницу в скорбном странствовании нашем, темже Ти благодарне зовем:
Радуйся, благословенная Одигитрие; радуйся, истиннаго Пути Мати.
Радуйся, сквозе пустыню мира сего нас провождающая; радуйся, Амалика мысленнаго преславно побеждающая.
Радуйся, источники благодати от иконы Твоея источающая; радуйся, закон Сына Твоего, Христа Бога нашего, на скрижалех сердец наших написующая.
Радуйся, зноем страстей палимых благодатное окропление; радуйся, изнемогающих всемощное укрепление.
Радуйся, сердец смятенных тишайшая усладо; радуйся, странных и сирых Божественная отрадо.
Радуйся, землю обетованную нам приуготовляющая; радуйся, небеснаго Иерусалима врата нам отверзающая.
Радуйся, Владычице, знамения милости Твоея миру присно являющая.

Кондак 2

Видехом, видехом выну чудеса и знамения Твоя, Владычице, исповедуем милость, не таим благодеяний Твоих, обаче велегласно вопием: Аллилуиа.

Икос 2

Разум Божий кто постиже и тайну судеб Его кто повесть? Возводит бо и низводит, смиряет и возносит, поражает и исцеляет, и кто бысть советник Ему? Темже и нас, грех наших ради, смири и царство наше низложи, сыны наша по всему лицу земли разсеяв. К кому убо прибегнем в скорби нашей, к кому руце прострем, аще не к Тебе, Всеблагая. Обаче сердцем сокрушенным вопием Ти таковая:
Радуйся, Сына Твоего за нас умоляющая; радуйся, праведный гнев Божий утоляющая.
Радуйся, беззаконий наших очищение; радуйся, грешным Ходатаице прощения.
Радуйся, светильник упования немеркнущий нам возжегшая; радуйся, во исходе и странствовании нашем иконою Твоею нам предтекшая.
Радуйся, вся разсеянныя воедино собирающая; радуйся, омофором Твоим светообразным вся покрывающая.
Радуйся, раздоры и нестроения умиряющая; радуйся, советы нечестивых разоряющая.
Радуйся, плавающих в житейском море окормляющая; радуйся, попечением Твоим ни единаго же оставляющая.
Радуйся, Владычице, знамения милости Твоея миру присно являющая.

Кондак 3

Силы Тобою деются и благодать от честныя иконы Твоея неоскудно изливается, Преблагословенная Дево, вся подвизая о Тебе вопити: Аллилуиа.

Икос З

Имущи милосердие неизреченное, тамо благодать Твою возсияваеши, Всеблагая, идеже тьма огустевает и скорби преумножаются, темже не оставила еси нас сирых, обаче во иконе Твоей к нам убогим пришла еси, славящим Твое снисхождение и вопиющим сице:
Радуйся, чудес море; радуйся, милости пучино.
Радуйся, благодати приснотекущий источниче; радуйся, исцелений кладезю неисчерпаемый.
Радуйся, естества уставы победшая; радуйся, законы естественныя пременившая.
Радуйся, скорби наша на радость прелагающая; радуйся, плач и стенание в веселие духовное претворяющая.
Радуйся, озлобления и беды на пользу нам обращающая; радуйся, враги наша преславно смиряющая.
Радуйся, чаяния врагов посрамляющая; радуйся, поющия Тя возвеселяющая.
Радуйся Владычице, знамения милости Твоея миру присно являющая.

Кондак 4

Бури искушений, на нас находящия, скорбям же и болезням, нас посещающим, егда терпению в нас оскудевати и духу нашему смущатися, притецем ко образу Пречистая Девы и слезы точаще Той, от сердца возопиим: Богоноснеи руце Твои нам простирающи, из глубины зол возведи ны, яко да благодарными усты зовем: Аллилуиа.

Икос 4

Слышаху древле людие российстии слух явления святаго Твоего образа в дубраве Курстей и текше к нему со тщанием, умильно взываху: «Откуду нам сие, да прииде к нам Мати Господа нашего», узрев же икону Твою, Владычице, при корене древеснем лежащую, и приемше ю, яко сокровище великое, возопиша Тебе, Первообразней:
Радуйся, раю светлейший, древо Жизни израстивший; радуйся, вертограде Божественный, древо Церкви прозябший.
Радуйся, Цвете благовонный, мир весь облагоухаяй; радуйся, крине непорочный, вселенную украшаяй.
Радуйся, лозо благоплодная, вином умиления всех напоившая; радуйся, розго освященная, плоды сладостными род человеческий напитавшая.
Радуйся, кореню домостроительства Божия; радуйся, спасения нашего верх и главизно.
Радуйся, злыя наши страсти из корене посекающая; радуйся, добродетелей сад насаждающая.
Радуйся, добрые обычаи в нас вкореняющая; радуйся, причастники райския жизни быти нас сподобляющая.
Радуйся, Владычице, знамения милости Твоея миру присно являющая.

Кондак 5

Боготочней звезде подобящеся, икона Твоя честная, Госпоже, землю Русскую и грады ея обтекаше, царие сей благоговейно поклоняхуся, царицы любовию ту благоукрашаху, архиереи страхом сретаху, верных же множества, духовно торжествующе, вопияху: Аллилуиа.

Икос 5

Видяще безбожников безумный совет икону Твою, Пречистая, разорити, от Тебе, Дево, посрамленный, и обретше образ Твой святый, от всякаго действа сокрушительна невредим, монаси и мирстии страхом и любовию возопиша Ти сицевая:
Радуйся, крепосте несокрушимая; радуйся, стено нерушимая.
Радуйся, лютых безбожников совет посрамившая; радуйся, чаяния врагов осуетившая.
Радуйся, хулителей уста заградившая; радуйся, икону Твою святую невредимо сохраншая.
Радуйся, от руки злодейской сия соблюдшая; радуйся, очи Твои от скверных дел человеческих обращающая.
Радуйся, лица Твоего Пречистаго от нас, убогих, не отвращающая; радуйся, из руки диаволи грешныя исхищающая.
Радуйся, прощение кающимся возсиявающая; радуйся, двери милосердия Божия ходатайством Твоим отверзающая.
Радуйся, Владычице, знамения милости Твоея миру присно являющая.

Кондак 6

Проповедует мир весь милости, от иконы Твоея изливаемыя, Всецарице! Отнелиже бо изшла еси тою из земли Русския, несть град, ниже весь, в нихже не бе являема сила Твоя. Темже от всех язык спасеннии и Тобою вопиют благодарно Богу: Аллилуиа.

Икос 6

Возсияй нам паки свет упования, Богородице Пречистая, зарю спасения миру возвестившая во Твоем рождестве. Не предаждь нас до конца в руце врагов наших и советы нечестивых и лютых отступников скоро разори. Да будет и страна наша Российская, якоже древле дом Твой, да процветет в ней благочестие, святыя обители и храмы да благоукрасятся, людие же, от лютых безбожников избавльшеся, да торжествуют с веселием, славяще Твое заступление и зовуще Ти таковая:
Радуйся, любовию Твоею всему миру возсиявшая; радуйся, из уст Божественных Сына Твоего всыновление рода человеческаго приявшая.
Радуйся, Мати Божия и Мати христианом; радуйся, недугов отъятие и Целительнице раном.
Радуйся, в темницах сущих незаходимый Свете; радуйся, узников отрадо и пространство клетей.
Радуйся, за правду гонимых дерзновение; радуйся, за веру страждущих тернение.
Радуйся, мучеников венчание; радуйся, мучителей грозное воздаяние.
Радуйся, связнем узы разрешающая; радуйся, телом и душою плененных свобождающая.
Радуйся, Владычице, знамения милости Твоея миру присно являющая.

Кондак 7

Хотящу праведному Судии и Богу человеки, Того забывающия, вразумити, попусти бранем велиим на земли воздвигнутися. Языцы бо смятошася и царства поколебашася. Смерть и ужас по лицу земли проидоша, плач и стенание воздух огласи. Тогда убо вси, иже на Тя упование возложиша, Богородице, ко образу Твоему усердно притекаху и, от Тебе единыя спасения чающе, Богу, давшему Тя людем Заступницу, вопияху: Аллилуиа.

Метки: Богородица
Pages: 1 2

Акафист Пресвятой Богородице, читаемый пред честной иконой Ея Черниговско-Гефсиманской

Кондак 1

Избранней от Святыя Троицы, превысшей Небесе и земли, Царице Богородице благодарственная песнопения воспеваем. Ты же, Пречистая, яко имущия державу непобедимую, от всяких нас бед свободи и на всякое разумение настави и к деланию заповедей Сына Твоего приведи, да зовем Ти:
Радуйся, Царице Богородице, упование и прибежище наша.

Икос 1

Во дни оны Пречистая Божия Мати милость Свою граду Чернигову дати восхоте. И се, чудная икона Ея на древе ели явися; тем же и нарицается Черниговская Елецкая. И вернии православнии людие с великою радостию ту икону взяша и Матерь Божию прославиша, глаголюще:
Радуйся, Заступнице усердная рода христианскаго;
Радуйся, Поборнице верных.
Радуйся, яко Тобою радость воссияет;
Радуйся, бесов поражение.
Радуйся, благочестивых озаряющая смыслы;
Радуйся, мудрых века сего посрамление.
Радуйся, море чудес многоводное;
Радуйся, Споручнице грешных усердная.
Радуйся, к Сыну Твоему ходатайство немолчное;
Радуйся, благ вечных Подательнице.
Радуйся, Сокровище многих щедрот;
Радуйся, верных спасение чудное.
Радуйся, Царице Богородице, упование и прибежище наша.

Кондак 2

По времени, грех наших ради, сия икона чудотворная утрачена бе; но не до конца прогневася Пресвятая Богородица и милость Свою граду Чернигову паки возврати. И се, иная чудотворная икона во граде Чернигове явися, во обители пророка Божия Илии; тем же и наречена бе Черниговская Ильинская. Мы же, грешнии, милость Пресвятыя Богородицы прославляем, вопиюще: Аллилуйя.

Икос 2

Многажды прегрешили есмы и каемся трепеща: неужели гнев Господень поразит нас? И паки таяжде творим. И во дни оны святая обитель пророка Илии разорена бе и икона чудная Пресвятыя Богородицы исчезе. Но и списки ея чтимии мнози по земли Русстей распространишася. Мы же, грешнии и смиреннии, яко видехом милость Пресвятыя Богородицы, вопием:
Радуйся, Агнца и Пастыря Мати;
Радуйся, многих зол избавление.
Радуйся, Царице Небесе и земли;
Радуйся, Упование верных.
Радуйся, Столпе веры непоколебимый;
Радуйся, скорбящих Отрадо и Утешение.
Радуйся, Главизно пророческих словес;
Радуйся, мученик светлая Славо.
Радуйся, в терпении помощь всесильная;
Радуйся, падших восстание.
Радуйся, заблуждших вразумление;
Радуйся, Сокровище благих неоскудное.
Радуйся, Царице Богородице, упование и прибежище наша.

Кондак 3

Имущи упование на Тя, всех христиан Надеждо, благочестивая девица Александра, получивши в дар икону сию честную, во граде Чернигове явлену, пред нею же излиющи всю скорбь души своея, вопиющи: Аллилуйя.

Икос 3

Имущи ум в Бозе утвержден и Господу Иисусу и Пречистей Матери Его послужити хотящи, девица Александра икону сию во обитель Гефсиманскую, иже при лавре Сергия преподобного, в рукотвореныя пещеры пожертвовати восхоте, да молятся иноци пред нею, глаголюще:
Радуйся, Христа Бога нашего Пречистая Мати;
Радуйся, Утробо Божественнаго воплощения.
Радуйся, превысшая Небесных воинств;
Радуйся, бесов поражение.
Радуйся, человек упование и утверждение;
Радуйся, наше спасение вечное.
Радуйся, мира неустанная Хранительнице;
Радуйся, земли Русския Предстательнице и Защитнице.
Радуйся, в бурех и напастех пристанище;
Радуйся, просвещение во тьме сущих.
Радуйся, в нуждах скорая Помощнице;
Радуйся, иноцев Наставнице.
Радуйся, Царице Богородице, упование и прибежище наша.

Кондак 4

По прошествии лет Пречистая Дева Богородица сию Свою икону чудесы многими прославити восхоте, да славят людие Московстии благодать Божию, непрестанно зовуще: Аллилуйя.

Икос 4

Во дни оны благочестивая жена Фекла, тяжцем недугом обдержима сущи и николи же исцеление получити сподобльшися, в пещеры Гефсиманстии принесена бе. И абие недуг расслабления остави ю пред лицем людий многих. Тем же и мы благодарно вопием:
Радуйся, всея Вселенныя Мати;
Радуйся, скорбей и печалей наших Утоление.
Радуйся, в бедах и напастех Заступление;
Радуйся, Щите всем чистым сердцем.
Радуйся, просвещение во тьме сущих;
Радуйся, Надеждо благочестивых неизменная.
Радуйся, Взыскание нас погибающих;
Радуйся, христианом ходатайство благоприятное.
Радуйся, Ниво щедрот многоплодная;
Радуйся, Разума свет воссиявшия.
Радуйся, Живот, Истину и Путь нам показавшия;
Радуйся, яко в Рождестве и по Рождестве Дева пребываеши.
Радуйся, Царице Богородице, упование и прибежище наша.

Кондак 5

Вси людие Московстии дивящеся, како в пещерах новозданных таковое чудо явися. И абие святитель Иннокентий, стольнаго града Москвы пастырь, сие чудо испытати восхоте. И в беседе с женою Феклою истину уведый, прослави благодать Божию и милость Царицы Богородицы, вопиюще: Аллилуйя.

Икос 5

От того дне и часа прослави Царица Небесная сию икону Свою чудесы многими; не токмо в земли Московстей, но и паче из многих мест земли Русской людие притекаху и благодати исцелений сподобляхуся. Тем же и мы благодарно вопием:
Радуйся, благословенная в женах;
Радуйся, благая Вратарнице, Небеса открывающая.
Радуйся, Руно орошенное;
Радуйся, Стено необоримая.
Радуйся, Свеще неугасимая;
Радуйся, чудес Подательнице.
Радуйся, ширшия небес;
Радуйся, Скиние святая, в ней же прославися Господь.
Радуйся, Земле обетования;
Радуйся, Кивоте святыни.
Радуйся, человек естество обожившая;
Радуйся, Хлеб животный нам даровавшия.
Радуйся, Царице Богородице, упование и прибежище наша.

Кондак 6

Яко иногда от иконы тоя чудеса течаху обильно и людие православнии милости Господни прославляху; сице и ныне мы, недостойнии, Твоя, Владычице, благодеяния согласно славим, вопиюще: Аллилуйя.

Икос 6

Людие Русскии, благодать Божию славяще и сию икону новоявлену, многими чудесы прославлену, благоговейно лобызающе, вопияху:
Радуйся, Сына Твоего и Бога за нас умоляющия;
Радуйся, ходатайство ко Господу благоприятное.
Радуйся, оружие на врази многовидное;
Радуйся, Покрове овцам Христовым.
Радуйся, духу сокрушенному Отрадо и Утешение;
Радуйся, от напастей вражиих защищение.
Радуйся, Заре света Христова;
Радуйся, возвестившия пленным спасение.
Радуйся, высото несравненная;
Радуйся, горних воинств честнейшия.
Радуйся, Утро, принесшее День;
Радуйся, рождшая Солнце правды.
Радуйся, Царице Богородице, упование и прибежище наша.
Pages: 1 2

Акафист преподобному благоверному князю Олегу Брянскому

Конда́к 1

Возбра́нный воево́до правосла́вных / и небе́сный засту́пниче Бря́нския земли́, / князе́й ру́сских украше́ние и мона́хов похвало́, / оби́тели первоверхо́вных Апо́стол основа́телю и покрови́телю / и о душа́х на́ших усе́рдный моли́твенниче, / благода́рственная пе́ния прино́сим ти, глаго́люще: / Ра́дуйся, преподо́бне кня́же Оле́же, Бря́нский чудотво́рче.

И́кос 1

А́нгельския Си́лы ра́довахуся благоче́стию твоему́, кня́же Оле́же, е́же измла́да благода́тию Бо́жиею яви́л еси́, блага́го ко́рене блага́я отра́сль быв. Мы же сора́дуемся им и, я́ко Бо́жия избра́нника, восхваля́ем тя си́це:
Ра́дуйся, благочести́вых роди́телей благослове́нный плод;
ра́дуйся, я́ко па́мять твоя́ почита́ется в род и род.
Ра́дуйся, от ю́ности Христа́ Бо́га те́пле возлюби́вый;
ра́дуйся, в се́рдце оби́тель Свято́му Ду́ху угото́вивый.
Ра́дуйся, богослуже́нию усе́рдно прилежа́вый;
ра́дуйся, Сло́вом  Бо́жиим ду́шу свою́ пита́вый.
Ра́дуйся, преподо́бне кня́же Оле́же, Бря́нский чудотво́рче.

Конда́к 2

Ви́дя и слы́ша пра́ведное житие́ благове́рных сро́дников твои́х, Черни́говских князе́й Нико́лы Свято́ши и И́горя страстоте́рпца, му́ченика Михаи́ла и роди́теля твоего́ Рома́на, еще́ же и дще́ре Михаи́ловы преподо́бныя Евфроси́нии Су́здальския, потща́лся еси́, свя́те Оле́же, подража́ти им, воспева́я Бо́гу: Аллилу́иа.

И́кос 2

Ра́зум богопросвеще́нный от ю́ности стяжа́в, благове́рне кня́же Оле́же, не прельсти́лся еси́ су́етною сла́вою княже́ния земна́го, почита́я сие́ я́ко сугу́бое служе́ние лю́дем Бо́жиим, вруче́нным попече́нию твоему́. Сего́ ра́ди приими́ от нас сицева́я:
Ра́дуйся, любо́вию о Христе́ испо́лнивыйся;
ра́дуйся, оте́ц чадолюби́вый лю́дем яви́выйся.
Ра́дуйся, печа́льных благи́й уте́шителю;
ра́дуйся, в беда́х су́щим предста́телю.
Ра́дуйся, ни́щих и убо́гих пита́телю;
ра́дуйся, вдов и сиро́т покрови́телю.
Ра́дуйся, преподо́бне кня́же Оле́же, Бря́нский чудотво́рче.

Конда́к 3

Си́лою Ду́ха Свята́го укрепля́емь, блаже́нне кня́же Оле́же, в ми́ре сем живя́, собла́знов его́ удаля́лся еси́, уедине́нно в вертогра́де роди́телей твои́х водворя́яся; те́мже и утвержде́нию ве́ры правосла́вныя ревну́я, пе́рвую в земли́ Бря́нстей оби́тель во и́мя святы́х апо́стол Петра́ и Па́вла основа́л еси́, да и́ноцы ея́ непреста́нно воспева́ют Бо́гу: Аллилу́иа.

И́кос 3

Име́я богоприя́тное жела́ние от суеты́ мирски́я удали́тися, укрепи́лся еси́ в нем, егда́ и́ноцы созда́нныя тобо́ю оби́тели вку́пе с Пече́рскими принесо́ша от Ки́ева чудотво́рную ико́ну Богома́тере, моле́ния ра́ди неду́гующаго роди́теля твоего́. Те́мже ублажа́юще изволе́ние твое́, вопие́м ти та́ко:
Ра́дуйся, у́зкий путь Христо́в возлюби́вый;
ра́дуйся, бога́тство и сла́ву ми́ра возненави́девый.
Ра́дуйся, ру́це на ра́ло Госпо́дне возложи́вый;
ра́дуйся, вспять лица́ твоего́ николи́же обрати́вый.
Ра́дуйся, Оте́чества Го́рняго дости́гнути возжеле́вый;
ра́дуйся, кня́жескую диади́му ра́ди Небе́сного венца́ оста́вивый.
Ра́дуйся, преподо́бне кня́же Оле́же, Бря́нский чудотво́рче.

Конда́к 4

Бу́рею напа́́стей коле́блемо отечество твое́ зря, кня́же Оле́же, ага́ряны и злове́рными разоря́емо, еще́ же и междоусо́бными бра́нями терза́емо, щито́м ве́ры правосла́вныя огради́вся, и мече́м моли́твы вооружи́вся, на враги́ изше́л еси́, поя́ Спаси́телю Бо́гу: Аллилу́иа.

И́кос 4

Слы́шав отца́ твоего́, благове́рнаго кня́зя Рома́на, во благодаре́ние за исцеле́ние оби́тель Све́нскую основа́вшаго и вся, ели́ки ви́де прозре́вшима очи́ма, зе́мли ей дарова́вшаго, себе́ самаго́ в же́ртву Бо́гу прине́сл еси́, свя́те Оле́же, и во оби́тель сию́ всели́лся еси́. Сего́ ра́ди воспева́ем тя си́це:
Ра́дуйся, взе́мый крест свой и Христу́ после́довавый;
ра́дуйся, земны́я по́чести ни во что́же вмени́вый.
Ра́дуйся, по за́поведи Христо́вой смири́выйся;
ра́дуйся, господи́н быв и служи́тель всем соде́лавыйся.
Ра́дуйся, люботру́дное житие́ избра́вый;
ра́дуйся, в посте́ и моли́твах пребыва́вый.
Ра́дуйся, преподо́бне кня́же Оле́же, Бря́нский чудотво́рче.

Конда́к 5

Боготе́чней звезде́ уподо́бился еси́, преподо́бне Оле́же, егда́ от черто́га кня́жеска во оби́тель первоверхо́вных Апо́стол, я́ко в черто́г Небе́снаго Жениха́, преше́л еси́, о благостоя́нии Святы́я Це́ркве, благоустрое́нии оте́чества и спасе́нии душ вруче́нных ти Бо́гом люде́й усе́рдно моля́ся и со умиле́нием поя́: Аллилу́иа.

И́кос 5

Ви́девше боголюби́вии лю́дие гра́да Бря́нска пра́ведное житие́ твое́, Оле́же богоно́сне, попремно́гу че́ствоваху щедро́ты и по́двиги твоя́. Ты же смиренному́дренно благодаре́ние Бо́гу приноси́л еси́, сего́ ра́ди и Той тя просла́ви и научи́ ве́рныя воспева́ти та́ко:
Ра́дуйся, дух пра́выя ве́ры укрепля́яй;
ра́дуйся, ре́вность по Бо́зе возгрева́яй.
Ра́дуйся, дея́нию богомы́слие приложи́вый;
ра́дуйся, тщесла́вие и горды́ню сокруши́вый.
Ра́дуйся, дре́вним отце́м единонра́вный;
ра́дуйся, Бо́гом и людьми́ возлю́бленный.
Ра́дуйся, преподо́бне кня́же Оле́же, Бря́нский чудотво́рче.

Конда́к 6

Пропове́дник ве́ры правосла́вныя и ревни́тель благоче́стия сло́вом и житие́м был еси́, богоблаже́нне кня́же Оле́же, еди́нем бо жела́нием, подо́бно пра́деду твоему́ равноапо́стольному кня́зю Влади́миру, горе́л еси́, да вси лю́дие земли́ твоея́ присво́ятся Христу́ и вку́пе с тобо́ю воспева́ют Ему́: Аллилу́иа.

И́кос 6

Возсия́л еси́ в де́брех, град Бря́нск о́крест облежа́щих, я́ко у́тренняя заря́, и я́ко зве́зды небе́сныя, озари́ша зе́млю на́шу доброде́тели твоя́, и́миже и ны́не просвеща́еши немо́лчно воспева́ющих тя си́ми похва́льными словесы́:
Ра́дуйся, во Све́те невече́рнем пребыва́яй;
ра́дуйся, ду́ши на́ша чудесы́ просвеща́яй.
Ра́дуйся, сто́лпе о́гненный в пусты́ни греха́ блужда́ющим;
ра́дуйся, путево́дная звездо́ на Не́бо ше́ствующим.
Ра́дуйся, нетле́нием телесе́ от Бо́га почте́нный;
ра́дуйся, благода́тию Христо́вою облече́нный.
Ра́дуйся, преподо́бне кня́же Оле́же, Бря́нский чудотво́рче.
Pages: 1 2

Акафист иконе Пресвятой Богородицы «Зиновинская»

Кондак 1

Богоявленный покров всех скорбящих и грехми обремененных, Царицу нашу преблагую, паче естества и слова Единородное Божие Слово рождшую, пением молебным ублажим:
Радуйся, Владычице Зиновинская, духовныя очи наша отверзающая.

Икос 1

Хотя благословение исцеляющее на верныя люди Твоя излияти, явила еси чудную икону Твою, «Зиновинская» именуемую, да веи, благодать изобильную от нея приемлющии, благодарным сердцем Богородице воспоют:
Радуйся, Пренебесная, Нетленная, Чистая;
Радуйся, Невместимаго всеми вместившая.
Радуйся, Небес Царя Бога рождшая;
Радуйся, Святая святых большая.
Радуйся, Сыну Твоему и Богу сопребывающая;
Радуйся, преславно с Богом царствующая.
Радуйся, Владычице Зиновинская, духовныя очи наша отверзающая.
Кондак 2
Издревле род христианский Твоим предстательством щедро снабдевая и просвещение, исцеление и воспитание чрез чудотворныя иконы Твоя ему даруя, благоволила еси, Богородице, землю Подольскую посетити и всех в ней сущих к пению таковому подвигнути: Аллилуиа.
Икос 2
Видя некая раба Божия свет духовный, в дому ея от пречистаго образа Богородицы многажды исходящий, священника и народ Божий о сем извести, да явлен будет миру цельбоносный лик Твой, егоже зряще возопиим:
Радуйся, Дево Мариам, приятное Богу имя и существо;
Радуйся, преукрашенная благодатию Мати Божия и Царице.
Радуйся, огнь Божества во чреве неопально приимшая;
Радуйся, смертных естество обожившая.
Радуйся, чистая Слова Питательнице;
Радуйся, живоприемный Источниче.
Радуйся, Владычице Зиновинская, духовныя очи наша отверзающая.
Кондак 3
Возсия в сердцах христианских Твоея благодати нетленный свет, мысленныя очи душ наших освящающий, страх блаженных заповедей Христовых в нас влагающий и со умилением пети научающий: Аллилуиа.
Икос 3
Многоразличныя исцеления источаше чудотворная икона Твоя, Богомати, по пренесении ея во святый Божий храм, болящии бо сердцем, умом и телом облегчение в недузех, очищение в чувствиих и смирение в мыслех обретаху, велегласно к Тебе взывающе:
Радуйся, огненосная Купина;
Радуйся, достохвальный Кивоте Божия завета.
Радуйся, златая Стамна, в ней же манна небесная — Христос соблюдеся;
Радуйся, честный Сосуде, в нем же евангельский многоценный бисер обретеся.
Радуйся, неоранная Земле Господня, израстйвшая нам Клас живота;
Радуйся, светоносный Свещниче незаходимаго Света.
Радуйся, Владычице Зиновинская, духовныя очи наша отверзающая.
Кондак 4
Яко венцем пресветлым, Пречистая Богородице, иконою Твоею Церковь Христова обогатися, и ликует, о таковом духовном сокровище вопиющи Богу: Аллилуиа.
Икос 4
Явила еси сугубую Твою милость, чадо малое, Даниила, от разслабления внезапнаго исцеливше, темже и славу сугубую новоявленной иконе Твоей снискала еси, пред неюже, вернии, умиленно возопиим:
Радуйся, диадимо честная божественныя славы;
Радуйся, надеждо известная и христиан похвало.
Радуйся, Лествице небесная, восходящая от земли к Престолу Божию;
Радуйся, Горо Господня, покрывшая небеса добродетелию.
Радуйся, о неисчерпаемый кладенец милосердия;
Радуйся, о безмерная глубино любве.
Радуйся, Владычице Зиновинская, духовныя очи наша отверзающая.
Кондак 5
Обетование данное Небесной Владычице исполняя, благодарственно возопи благочестивый родитель: «Приими, Всеблагомощная, чадо мое под покров Твой и буди ему Поручница к Рожденному из Тебе, Емуже присно взываем: Аллилуиа.
Икос 5
Живый под покровом Пречистыя исцеленный отрок пламенную любовь к Ней возымел есть и, восходя от силы в силу неизреченным Владычицы милосердием, архиерей Божий бысть, истово же работая Матери-Церкви, житием своим Христа Господа и Богородицу прослави, выну вопия:
Радуйся, Богородице Дево, проповедание мое;
Радуйся, Всесвятая Госпоже верных.
Радуйся, Сына и Слова раю словесный;
Радуйся, Преславный Граде Господень.
Радуйся, Дивная Колеснице Божия;
Радуйся, Красото земли преизобильная.
Радуйся, Владычице Зиновинская, духовныя очи наша отверзающая.
Кондак 6
Всяческая исполняются святости, егда благословение Твое, Богомати, прияти сподобятся. Такожде и архиепископ Модест, о славе Твоей поревновав, к славе святителя Христова вознеслся есть, вразумляя всех верных прославляти Бога: Аллилуиа.
Икос 6
Память святую храня о неизглаголаннем чудеси своего исцеления, возымел есть владыка Модест желание неотступное храм Божий во славу Пресвятыя Троицы и Богоматери во отечествии своем воздвигнути, да вси входящии вонь дивный образ Пречистыя возмогут узрети и умиленным сердцем пред ним возопити:
Радуйся, чудная Божия Палато;
Радуйся, земли и неба Всецарице.
Радуйся, Неоскверненная и Девственная, из Неяже создася новый Адам;
Радуйся, Книго таинственная, в Нейже написася Божие Слово.
Радуйся, Одре честный, святый и Богоприемный;
Радуйся, Образе, промыслом Всемогущаго благосоделанный.
Радуйся, Владычице Зиновинская, духовныя очи наша отверзающая.
Кондак 7
Тайная человеческая ведый Един благоволил благочестивому желанию архиерея явным стати и велелепному храму во имя Пресвятыя Троицы воздвигнутым вскоре быти, мы же таковому о нас Божию смотрению радующеся, воззовем: Аллилуиа.
Икос 7
Возсия всему краю Подольскому свет спасения от пречуднаго образа Твоего, Богомати, егда в ризу позлащенну одеяна предстала еси сердцам молящих Ти ся в новоосвященнем храме и благодарственно поющих:
Радуйся, Сладчайшаго Сына Сладчайшая Мати;
Радуйся, Прибежище великое и Похвало верным.
Радуйся, Саде заключенный, идеже Древо жизни и безсмертия;
Радуйся, Источниче запечатленный, в немже поток сладости всенеизреченныя.
Радуйся, Вместилище умныя святыни;
Радуйся, Подательнице божественныя благостыни.
Радуйся, Владычице Зиновинская, духовныя очи наша отверзающая.
Метки: Богородица
Pages: 1 2